Orkuvörður starfrækja RES
Orkuvörður ehf. hafa með stuðningi fyrirtækja og stofnana á borð við Vaxtarsamning Eyjafjarðar, Háskólann á Akureyri og Háskóla Íslands unnið að stofnun skólans. Hluthafar eru Þekkingarvörður ehf., RARIK, KEA, Gift fjárfestingafélag, Landsvirkjun, Norðurorka, Akureyrarbær og Landsbanki Íslands.
Einn fárra skóla á þessu sviði í heiminum
Samhliða aukinni orkunotkun, hærra orkuverði og auknum umræðum um loftslagsbreytingar eru orku- og umhverfismál sífellt ofar í hugum fólks. Aukin nýting endurnýjanlegra orkugjafa á því mun meira fylgi að fagna nú en áður, og þá ekki síst sem liður í að draga úr útblæstri gróðurhúsalofttegunda.
Ísland í forystu í orkumálum
Sérstaða og þekking Íslendinga á nýtingu endurnýjanlegra orkugjafa skapa einstakt umhverfi til reksturs og uppbyggingu sérhæfðs orkuskóla hér á landi.
- Hátt hlutfall heildarorkunýtingar á Íslandi er frá endurnýjanlegum orkugjöfum.
- Yfirlýst stefna íslenskra stjórnvalda í orkumálum miðar að frekari nýtingu endurnýjanlegra orkugjafa með umhverfissjónarmið að leiðarljósi, ásamt áherslu á uppbyggingu íslensks vetnissamfélags.
- Mikil sérfræðiþekking er til staðar hérlendis á nýtingu jarðvarma, vatnsafls og vetnis sem orkubera. Íslensk fyrirtæki bjóða ráðgjafaþjónustu um nýtingu jarðvarma víða um heim.
- Jarðhitaskóli Háskóla Sameinuðu Þjóðanna hefur verið starfræktur hér á landi síðan 1979. Mikið brautryðjendastarf hefur verið unnið við skólann og lagður grunnur að alþjóðlegu samstarfi um nýtingu jarðhita.
Alþjóðlegt meistaranám
Megin áhersla RES er alþjóðlegt meistaranám í vistvænni orkunýtingu, samtals 45 einingar eða 90 ECTS. Byggt er á svokölluðu
Bologna ferli um samræmingu á háskólastiginu í Evrópu og áformum um uppbygginu evrópsks rannsóknasvæðis.
Kennsla í meistaranáminu hófst í fyrsta skiptið í febrúar 2008 þegar 31 nemandi frá tíu þjóðlöndum hófu
nám við skólann. Námsárið 2009 - 2010 býður skólinn upp á nám á fjórum brautum: Jarðhitabraut; efnarafala og
vetnisbraut; lífmassabraut; og braut um orkukerfi og orkustjórnun.
Í framtíðinni er stefnt að því að RES bjóði upp á nám á öllum sviðum endurnýjanlegra orkugjafa, þannig
að það bætist við námsbrautir í vatnsaflsorku, vind- og sjávarfallaorku, auk sólarorku.
Meistaranámið er rannsóknatengt og alþjóðlegt. Öll kennsla og samskipti við nemendur fer fram á ensku og verður því unnt að
bjóða námið erlendum nemendum til jafns við íslenska. Þetta fyrirkomulag gefur einnig mikla möguleika í tengslum við kennslu- og
rannsóknasamstarf við erlenda rannsóknaháskóla og stofnanir. Fyrirkomulag og uppbygging námsins gerir RES einnig kleift að bjóða
sérfræðingum og háskólanemendum að sækja einstök námskeið skólans. Nánari upplýsingar um námskeiðin
fást hér: www.res.is/graduateschool/page/course_catalog
Samhliða uppbygginu námsins hafa forráðamenn RES markvisst byggt upp formlegt samstarfsnet, RESnet, með á þriðja tug háskóla í
Evrópu og Ameríku sem undirritað hafa samninga um samstarf við skólann. Netinu er ætlað að vera vettvangur fyrir samstarf á sviði menntunar og
rannsókna auk þess að vera mikilvæg uppspretta tengsla fyrir eigendur og nemendur RES.
Uppbygging námsins
Meistaranámið er byggt upp sem eins árs nám, með alls 45 einingum (90 ECTC) á þremur önnum. Kennslan er byggð upp þannig að hvert
námskeið (2-6 ECTC) tekur 1-3 vikur, þar sem 3-4 fyrirlestrartímar eru á dag auk dæmatíma, verklegra æfinga og skoðunarferða.
Inntökuskilyrðin eru ströng; krafist er góðar undirstöðu í verkfræði og/eða raungreinum, auk hagfræði.
Á fyrstu önn er farið yfir grunnatriði og eiginleika mismunandi endurnýjanlegra orkugjafa, aðferðir við rannsókn orkugjafanna, tæknilega- og
verkfræðilega þætti í tengslum við nýtingu, umhverfisáhrif nýtingar og almennt um stöðu orkumála í heiminum. Meðal
annars verður fjallað um aðferðir við að bæta orkunýtingu, nýjustu orkutækni, orkugeymslu, samsett orkukerfi og LCA-greiningar. Hagrænn
þáttur nýtingar orkuauðlinda verður sérstaklega skoðaður og fjallað almennt um stjórnun orkumála og mörkun orkustefnu.
Á annarri önn velja nemendur sér áherslu og taka fjölda námskeiða hver á sínu sviði. Áherslusviðin sjö sem boðið
verður upp á eru eftirfarandi:
- Jarðhitaorka (í boði frá 2008)
- Efnarafalar og vetni (í boði frá 2008)
- Lífmassaorka og vistvænt eldsneyti (í boði frá 2008)
- Vatnsaflsorka (í boði frá 2010)
- Vindorka, öldu- og sjávarfallaorka (í boði frá 2011)
- Sólarorka (í boði frá 2012)
- Orkukerfi og orkustjórnun (í boði frá 2009)
Áhersla er lögð á hagnýta og tæknilega þætti og að nemendur öðlist nægilega kunnáttu og færni til að taka virkan
þátt í úrlausn flókinna verkefna sem tengjast sívaxandi nýtingu endurnýjanlegra orkugjafa.
Á þriðju önn vinna nemendur 30 ECTS eininga meistaraverkefni undir handleiðslu kennara/sérfræðinga RES Orkuskóla, sérfræðinga
orkufyrirtækja, verkfræðistofa og/eða kennara við aðra innlenda eða erlenda samstarfsháskóla.
Nánari upplýsingar um meistaranám RES er hægt að nálgast hér: www.res.is/graduateschool/
RES Leiðtogaskóli og RES Sumarskóli
Við RES Orkuskóla er starfræktur RES Leiðtogaskóli og RES Sumarskóli. Leiðtogaskólinn mun hefja starfsemi sína haustið 2008 en þar
verður stjórnendum fyrirtækja boðið upp á stutt hagnýt námskeið á sviði umhverfis og orkumála. Neytendur verða æ
meðvitaðri um umhverfisstefnu fyrirtækja og framleiðenda og er því nauðsynlegt að búa stjórnendur þeim hæfileikum og þekkingu
sem þarf til þess að móta slíka stefnu.
Nánari upplýsingar um leiðtoganám RES er hægt að nálgast hér: www.res.is/executiveschool/
Sumarskóli RES hefur verið starfræktur í samstarfi við SIT - Study Abroad samtökin í Bandaríkjunum. Síðustu tvö sumur hafa um tuttugu
bandarískir háskólanemendur sótt sjö vikna námskeið á Íslandi með áherslu á endurnýjanlega orkugjafa og
orkuhagfræði. Sumarið 2009 mun RES auk þess bjóða upp á styttri sumarskóla fyrir háskólanemendur utan
Bandaríkjanna.
Nánari upplýsingar um sumarskóla RES er hægt að nálgast hér: www.res.is/summerschool/
Kennarar RES
Stærstur hluti kennara og annars starfsliðs skólans er alþjóðlegur en einnig koma að skólanum prófessorar og kennarar sem starfa við
Háskólann á Akureyri, Háskóla Íslands og ÍSOR. Það eru Háskóli Íslands og Háskólinn á Akureyri sem
munu samkvæmt samstarfssamningi við RES veita hina formlegu M.Sc. gráðu í endurnýjanlegum orkugjöfum. Megintekjur RES verða skólagjöld
nemenda.
Rannsóknaraðstaða RES
RES hefur að undanförnu byggt upp rannsóknaraðstöðu í tengslum við námið. Margvísleg þjónusta er samnýtt með
Háskólanum á Akureyri og Háskóla Íslands, sem og á Keili á Suðurnesjum, þar sem RES kemur að uppbyggingu á
aðstöðu til vetnisrannsókna. Í rannsóknaraðstöðu RES í Háskólanum á Akureyri er einnig að finna
sérhæfðan búnað til efnagreiningar á kristöllum og bergi, sem er til að mynda hægt að nýta við rannsóknir á
borholum.
Nánari upplýsingar um rannsóknaraðstöðu RES er að finna hér: www.res.is/is/page/research_facilities
Upplýsingablað um RES á PDF [182Kb]
Nánari upplýsingar veita
Skrifstofa RES
Netfang: res@res.is
Sími: 464-0100
